飯與意粉的精髓. 享用自家制美食

♦️ 招牌芝士熔岩蛋漿飯 Fried Rice with Egg Sauce & Cheese ♦️

上菜嘅時候鐵板上只有一舊撈左午餐肉同泡菜嘅飯,店員係顧客面前倒入蛋漿炒熟,然後倒入紫菜、一大碗Mozzarella芝士同蔥花撈勻,係撈嘅過程望住芝士溶化,啖啖飯都充滿住芝士,非常滋味呀!

然後當然要試埋另一款招牌菜啦!

logo_final 拷貝RiceLove飯意主題餐廳

香港都市人經常迫住食快餐,又貴又唔健康,想正正經經食個飯都難!係旺角通常行到好景商場就會屈番轉頭行,今日小編呀me就同你捐窿捐罅,行去旺角廣華街食好野!大家唔洗擔心,廣華街都只係好景商場再行前少少,絕對唔遠唔難搵㗎!

– – – – – – – – – – – – – – – – – – – – – – –  

食快餐係以飯同意粉做主題嘅你又試過未呢?

行到旺角廣華街,會見到間門面簡簡單單嘅餐廳,去到門口好容易就比佢嘅餐牌吸引住,仲有門口有好幾個牌寫住「請由此排隊」,由此可見就知佢有幾受歡迎啦!

– – – – – – – – – – – – – – – – – – – – – – –

入到餐廳,地方細細而且裝修簡單,但莫名奇妙好有親切感,有種私房菜嘅感覺。坐低左之後,見到隔離枱位店員幫顧客撈緊個芝士類嘅物體,小編們當然唔輸蝕都要試下啦,招牌菜喎!

♦️ 鐵板韓式芝士炒年糕 Korean Fried Rice cake with Cheese ♦️DSC_4667
呢個嘅次序有點唔同,店員會拎塊熱辣辣但乜都冇嘅鐵板,然後係顧客面前落一大碗Mozzarella芝士,當芝士溶得七七八八,就加入預先煮好左嘅韓式拉麵同韓式年糕,輕輕撈勻就加埋泡菜撈勻。記得襯熱食啊!口感好豐富,彈牙嘅拉麵加上非常黏韌嘅年糕,真係食過番噚味㗎!

– – – – – – – – – – – – – – – – – – – – – – –

之後小編們仲試左以下幾款食物~

♦️ 主題小食拼盤 Snack Platter ♦️DSC_4555
好豐富嘅小食拼盤,有六款食物,分別係香辣米米腸、沙律菜、水牛城雞翼、脆薯格、芝士烤大菇同埋吉列魷魚圈。當中較為特別嘅係香辣米米腸同芝士烤大菇。米腸係用白米、紅米、黑糯米同珍珠米混制而成,非常特別而且口感一流,好惹味!另外芝士烤大菇選用大傘菇,香味十足!用千島醬加吞拿魚醬再加入Mozzarella芝士烤製,入口非常Juicy,回味無窮!

飯同意粉做主題嘅餐廳,又點可以唔試下個意粉呢?

♦️ 卡邦尼意大利粉伴煙蔥炒蛋 Spaghetti Carbonara with Onions Scrambled Eggs ♦️DSC_4644
上菜果刻一望到意粉,係同平時食開嘅意粉有好大分別,外貌有點似烏冬,原來Rice Love嘅意粉係自家工場每日新鮮手制,絕對唔會擺過夜。手制意粉比一般意粉粗身,意粉嘅波浪紋可以掛住醬汁,而質地較為爽滑彈牙有嚼口!配上新鮮調製味道更濃嘅卡邦尼醬,令手制意粉味道更突出,達至最美味嘅效果。

近年日本、韓國都興起蛋包飯,當然香港都唔輸蝕啦!

♦️ 香煎漢堡蛋包飯 Fried Burger Omurice ♦️DSC_4588
漢堡扒亦係由自家工場每日新鮮即製,用豬肉同牛肉混製而成,塊塊都有手掌咁大塊,厚度亦唔弱!餐廳用獨特配方醃制,可以鎖住肉汁,夾住流質蛋一齊食,簡直係雙重享受!

最後一道菜式啦~

♦️ 進擊巨橋 ・ 濃湯芝士鍋 Grilled Baby Pork Ribs Cheese Pot ♦️DSC_4612
巨橋嘅意思係上面成座橋咁嘅豬肋骨,配搭專用醬汁,肉味濃厚,而且肥瘦適中,認真係啖啖肉,仲可以夾住薯格一齊食。然後下低配有一碗熱辣辣嘅芝士濃湯,裡面有較為滑身而黏韌嘅米制通粉、韓式餃子、韓式年糕同青椒,再配一大碗Mozzarella芝士,簡直豐富到不得了!

– – – – – – – – – – – – – – – – – – – – – – –

可能大家會覺得Rice Love主要都係澱粉質同萬惡嘅芝士,但Rice Love都特意創出兩款特飲,比各位顧客平衡番嘅!

DSC_4686
♦️ 綜合水果茶 Mixed Fruit Tea ♦️

小編自問係一個好怕飲水果茶嘅人,因為小編承受唔到水果茶太甜嘅味道,但Rice Love嘅綜合水果茶甜味唔會過濃,非常清甜㗎!

♦️ 青蘋果薄荷荔枝綠茶 Green Apple Lychee Mint Greentea ♦️

相比起黎講,小編係較為鍾意呢杯。小編對薄荷味情有獨鍾,呢杯有薄荷味之餘,青蘋果味亦非常突出,口感好Fresh,一口氣飲哂都得XD

– – – – – – – – – – – – – – – – – – – – – – –

唔講你唔知,Rice Love除左部分食材係自家制之外,老闆對其他食材都非常講究。主打招牌菜同好幾款食物都會有蛋漿,好多人會擔心雞蛋熟唔透會有菌,老闆嚴選雞蛋,全店都係用巴斯德雞蛋,保證無菌、無雌激素、無腥味!食落都安心好多啦!

– – – – – – – – – – – – – – – – – – – – – – –

小編們都覺得Rice Love嘅菜式份量都比較多,一般人似乎都會食唔哂。同老闆傾過計,原來老闆好支持顧客食唔哂就Take Away拎番屋企,而且唔收外賣盒錢!出面好多餐廳都會收一蚊一個外賣盒,老闆反而話「食客肯攞走唔浪費已經好好,佢地食得開心係大前題,又唔駛賺到盡嘅」,Rice Love抵食夾大件,抵你咁受歡迎啦!

小編提提你!Rice Love深水埗總店同旺角分店都不設訂座,想食就要去排隊,不過要記住,人齊先入得㗎!又平又好食,排一陣隊,付出多少代價都抵啦!

– – – – – – – – – – – – – – – – – – – – – – –

FullSizeRender

深水埗總店:九龍深水埗 元州街 146 – 150 號 華興大廈地下B舖

電話查詢: 2361 1611 (不設訂座)

旺角分店:九龍旺角 廣華街 15 – 33 號 明威閣地下L舖

電話查詢:2707 4707 (不設訂座)